Enpresen eta profesionalen sarea

Hizkuntzen kudeaketa osasun arretan: euskara komunikazio klinikoan (UPV/EHUren Berezko Titulua)

UEU

2020-01-10

(Ohar garrantzitsua: izen ematea UPV/EHUren web orrian egiten denez, web orri honen matrikulazio aukera soilik informazioa jasotzeko erabiliko da. Barkatu eragozpenak.)

Graduondoko honek osasun-jarduera eta hizkuntza, euskara alegia, uztartzea du xede, ikuspegi profesional zein akademikotik, arretaren normalizazioa helburu. Horrenbestez, arretaren normalizazioa hauxe litzateke: indarrean eta eskura dagoen ebidentzia zientifikoan oinarrituriko eta, aldi berean, pertsonan zentraturiko osasun arreta eredu integratua. Aurrekoari jarraituz beraz, pazientearen hizkuntzan eskaintzen den arreta integratua litzateke; edonon, edonoiz, maila guztietan, ahoz zein idatzizko komunikazioetan, kalitatezkoa, errespetuzkoa eta ulergarria izan dadin, betiere pazientearen izaerarekin bateragarria, aldi berean segurtasun klinikoa eta kulturala bermatzeko. Arretaren normalizazioak hizkuntza eta arreta banaezinak izatea dakar, eta beraz, berezkoa du osasun arreta euskaraz eskaintzea. Ulergarria da, horregatik, arretaren normalizazioa hizkuntzaren normalizazio-prozesuan ere lagungarria izatea.

Hau guztia gogoan, hizkuntza eta osasun-arretaren gaia jorratzeko, lehenik eta behin osasun-jarduera bere testuinguruan kokatu behar da, horretarako gaur egun ardatz dituen paradigmak ondo aztertuz.

Osasun-arreta euskaraz bermatzeak aldaketa sakona eskatzen du nahitaez; taxuzko ezarpen-prozesu sendo eta eraginkorra. Arretaren normalizazioa eta xede horrekin osasun-sisteman euskararen erabilera normalizatzea, ez da nolanahiko erronka.

Graduondokoa UPV/EHUko Berezko Tituluen eskaintzan sartzen da, UPV/EHUko erretoreordetzak antolatuta.

Zuzendaritza eta antolaketa

• Zuzendaria: Jon Zarate (UPV/EHUko Euskara erretoreordea)

Talde antolatzailea:

• Jon Zarate (UPV/EHUko Euskara erretoreordea)
•  Izaskun Elezgarai (UEUko Talde Eragileko kidea, UPV/EHUko irakasle eta ikertzailea eta UEUkidea)
• Itziar San Martin (UPV/EHUko irakasle eta ikertzailea)
• Aitor Montes (Osakidetzako famili medikua)

Batzorde akademikoa:

• Jon Zarate (UPV/EHUko Euskara erretoreordea)
• Felix Zubia (Osakidetza-Donostia Unibertsitate Ospitale medikua eta UPV/EHU irakasle-ikertzailea)
• Xabier Arauzo (Osakidetza - Euskara zerbitzuburua)

Ezaugarri orokorrak:

• Eskolak UEUko Eibarko egoitza akademikoan eta UEUren Ikasgela Birtualean izango dira.
• Aurrez aurreko eskolak ostiraletan (arratsaldez) izango dira.
• Ikasleek, mintegietara agertzeaz gain, ikerketa lan bat ere egin beharko dute beraien interesen araberako gaia jorratuz.