Enpresen eta profesionalen sarea

Orreagatik (778) 36ko gerrara (1936): Nafarroaren historia, memoria eta kontakizunak.

UEU

2020-08-31

Nafarroaren historiaren inguruko eztabaidek gaurkotasun handia izaten jarraitzen dute. Horren erakusle dira oroimen ekitaldien eta espazio publikoan ikusgai ditugun elementuen inguruko polemika anitzak. Ikastaro honetan eztabaida horiei buruzko ikuspegi zabala jorratuko dugu. Alde batetik, Nafarroako historian izandako mugarri nagusi batzuk aztertuko ditugu eta ondoren horien harira sortutako kontakizun anitzen berri emango dugu, modu laburrean.

Helburu orokorra memoriaren, kontakizunen eta historiaren arteko lotura puntuetan arreta jartzea izango da honako pasarte historiko hauetatik abiatuta: Orreaga (778), Konkista (1512-1530), Lehen guda karlista (1833-1839) eta 36ko gerra (1936).

Ikastaro hau Euko Kultur Fundazioarekin elkarlanean antolatu da.

Eginen al dugu euskara ez sexista?

UEU

2020-08-31

Ikastaroa guztiz online izanen da.

“Euskara sexista egiten al dut? Euskara sexista al da, ba? Gaztelania askoz sexistagoa da…” Arituko zinen hausnarketa horietan, noiz edo noiz.

Gure pentsamendua eta gure mundu-ikuskera adierazteko hizkuntza behar dugu eta, aldi berean, hizkuntza(k) erabiltzeko moduak eragin egiten du gure pentsamenduan eta gure mundu-ikuskeran; beraz, gure barrena eta gure adierazpidea norabide biko errepideak dira eta elkar elikatzen dute.

Hizkuntzak berak baino areago, erabiltzeko moduak zehazten du zenbaterainoko sexismoa duen, baztertzailea den, inklusiboa den…; hortaz, erabiltzaileok, hiztunok dugu ardura eta erabakimena.

Gurera etorrita, maiz oharkabean baina, euskaraz ari garenean, era sexistan aritzen gara, ahoz zein idatziz; dela euskaraz sortzeko tenorean, dela itzulpena egitean. Albo hizkuntzen aldean, egia da zama sexista arinagoa duela gureak, baina badugu zer hobetu.

Ikastaro honetan, nolako euskara darabilgun aztertu eta hausnarketa eginen dugu. Horretarako, testuinguru zehatz batzuk landuko ditugu eta hobetzeko aukerak partekatuko ditugu.

Erabilera lagapeneko Etxebizitza Kooperatiben eredua: aukerak eta esperientziak.

UEU

2020-08-31

TALDEA BETE EGIN DA (20-06-09, 10:45). Itxaron zerrenda ireki da.

.

Etxebizitza Kooperatiben artean erabilera lagapeneko eredua ezagutzera ematea eta zehazki eredu horretan elkarbizitza komunitarioa sustatzen duten kooperatibena. Ikastaro honen helburua eredu horrek dituen ertzak eta ezaugarriak zeintzuk diren ondo azaltzea eta hausnartzea da. Euskal Herrian hainbat dira eredu honen baitan etxebizitzak eraiki edo eta eraberritzeko asmoz sortutako hainbat taldeen esperientziaren berri emango da ere, haietako batzuk, hiriguneetan, beste batzuk landa eremuan.

Ikastaro hau KoopFabrikarekin elkarlanean antolatu da.

Euskal Herria Dekoloniala Mintegia.

UEU

2020-08-31

Taldea berriz IREKI DA, plazak libre!

.

Mintegi honen bidez ikuspegi dekoloniala landu nahi dugu Euskal Herritik eta euskaraz. Eta zentzu berean, dekolonitatetik Euskal Herria landu.

Castro-Gómez, Grosfoguel, Carina Ochoa eta beste hainbat egungo pentsalarien arabera, ikuspegi dekoloniala baliogarria da mundu deskolonizatu eta poskolonialan bizi garen uste okertua gainditzeko. Are gehiago, bizirik irauten duten botere hierarkietan sakontzeko beharrezko tresnak eskaintzen dizkigu ikuspegi honek. Ekarpen hauek, gure mundua eta gure garaia sakonago ulertzeko ezinbesteko dira, eta, era berezian, eurozentrismoa eta honekin batera errotutako arrazakeria kolokan jartzeko.

Halaber, ikuspegi honek beste euskarri bat eskaintzen digu, estaturik gabeko herri gisa pairatzen ditugun subordinazio harremanen nondik-norakoa ulertzeko, eta ustez borondatezkoa den menpekotasunaren iturburuan aurkitzen diren mekanismoak argira ekartzeko.

Mintegi hau UEUk eta Iratzar Fundazioak elkarlanean antolatu dute.

Adin txikikoak eta Internet: arriskuak eta nortasun digitala

UEU

2020-08-31

Ikastaroa BETE egin da. Interesa izanez gero, izena eman eta itxaron-zerrendan sartuko zara.

Ikastaroa guztiz on-line izango da.

Une oro online egotearen beharra ez da garaiko moda bat. Internet ezinbesteko tresna bilakatu da eta gure bizitzako ia alderdi guztietako parte da: kultura, komunikazioa, ekonomia, lan-esparrua eta banakako zein taldeko ohiturak. Gaur egungo jendartea hiperkonektatuta bizi da.

Zalantzarik gabe Internet abantaila ugariren iturria da, baina baita egoera gatazkatsuena ere. Asko dira munduko sarerik handienaren erabilera desegokiaren ondorio gisa jasan ditzakegun esperientzia negatiboak edota arriskuak.

Adin txikikoen kasuan, Interneten aroan jaio dira eta konektatuta dauden gailuak modu intuitiboan eta erraz erabiltzen ohi dituzte. Edonola ere, sarean ematen diren egoera arriskutsuen aurrean erantzuteko heldutasun eta irizpide falta dute.

Horregatik, funtsezkoa da helduek haur eta nerabeen errealitate digitala ezagutzea eta arriskuen prebentziorako bitartekaritza-estrategiak barneratzea. Familia eta eskola adin txikikoen konektibitate segurua bermatzeko gako dira.

Ikastaroan adin txikikoen Interneten erabilera arduratsua garatzeko gidalerroak eskainiko dira.

Ez utzi biharko gaur egin dezakezuna: produktibitatea hobetzeko metodoen oinarriak eta tresna digital lagungarriak

UEU

2020-08-31

Ikastaroa BETE egin da. Interesa izanez gero, izena eman eta itxaron-zerrendan sartuko zara.

Ikastaroa guztiz online izango da.

Produktibitatea kalitate oneko emaitza eta hori lortzeko behar dugun denboraren arteko erlazioa da. Hau da, produktibitatearen helburua emaitzarik onena denbora laburrenean lortzea da, denbora ondare preziatua baita.

Zeregin guztiak ondo antolatzea eta denboraren kudeaketa egokia bideratzea produktibitatearen gako dira eta bizitzako esparru guztietan bete beharrekoak. Horrez gain, borondatea, diziplina eta iraunkortasuna ere behar dira,. produktiboa izatea ez baita lan erraza. Eta, horretarako, funtsezkoa da antolaketa-metodoek zein Informazio eta Komunikazio Teknologiek (IKT) eskaintzen dizkiguten aukerak ondo ezagutzea.

Baina posiblea da produktibitatea hobetzeko metodoen oinarriak baliabide digitalen bidez praktikan jartzea? Nola erabili ditzakegu zenbait tresna gure denbora hobeto kudeatzeko? Nola bideratu dezakegu taldeko koordinazio egokia? Zeintzuk dira posta elektronikoa ondo antolatzeko irizpideak?

Ikastaroan egunerokotasuneko banakako zein taldeko zereginak antolatzeko metodo ezagunenen helburuak eta ezaugarri nagusiak aztertuko dira, ondoren maila teorikoko antolaketa-prozedurak praktikan jartzeko. Horretarako, eskura ditugun zenbait tresna digital eta horien aukerak arakatuko dira. Horrela, pixkanaka, produktibitatearen gakoak barneratzea lortuko da.

“Ez utzi biharko gaur egin dezakezuna” atsotitza aplikatzen hasteko eta denbora ondo aprobetxatzeko momentua iritsi da!

Online edukiak kudeatzerakoan kontuan hartzeko gako juridikoak

UEU

2020-08-31

Ikastaroa BETE egin da. Interesa izanez gero, izena eman eta itxaron-zerrendan sartuko zara.

Hainbat legedi eta araudik ezarritakoaren arabera, aztertuko da juridikoki zer motatako edukiak erabil ditzakegun edo zer motatako jarduerak egin daitezkeen online munduan. Besteak beste honakoak kontuan hartuz:

• Jabetza intelektuala.
• Jabetza intelektualeko erregistroak/erroldak.
• Lizentziak (Creative Commons lizentziak eta abar).
• Patente eta marken araudia.
• Jabetza industriala.
• Datuak babesteko araudia.
• Araudi orokorra.
• Ohar legalak eta pribatutasun politikak.