Enpresen eta profesionalen sarea

Mondragonek nazioartekotzeko estrategiekin asmatu du

2012-07-17 - Enpresarean

2011ko datuek korporazioak nazioartean kokatzeko eta berritzeko egindako apustua egiaztatu dute. Multilokalizazioa gure lurraldean kokatutako kooperatibetako lanpostuak defendatzeko estrategia ona dela baieztatu da.

Mondragon Korpora­zi­o­ak “modu egokian” itxi zuen 2011ko ekitaldia, halaxe adierazi dute arduradunek. Izan ere,  343 milioi euroren emaitza operatiboak lortu zituzten, 2010ekoaren pare, eta aurreko urtean zeuden lanpostuak mantendu zituzten.

Talde kooperatiboak 2011ko ekitaldiko emaitzak aurkeztu berri ditu eta, egoera ekonomiko gogorra dagoen arren, aurreko urteko salmenten maila berdin­tzea lortu du (13.969 milioi euro). Bestetik, enplegua ere mantendu duela esan daiteke; 83.569 pertsona zenbatu ziren, % 0,1eko atzerakada txikiarekin aurreko urtearekiko. Horrez gain, eta 125 mili­oi euroren emaitza bateratuak lortu ditu, aurreko ekitaldian baino gutxiago izanik ere. Mondra­gonetik azaltzen dutenez, badira emaitza horiek argitzen dituzten hainbat arrazoi: Mondragoneko negozioen eskaintzaren dibertsitatea eta nazioarteko merkatuetan gero eta presentzia handiagoa izatea edo berrikuntzaren aldeko ­apustu irmoa.

Mondragonen 2011ko garapenaren funtsezko alderdietako bat nazioarteko estrategia izan da; horri esker, Taldea dagoeneko bost kontinenteetan ezarpen komertzialak eta produktiboak dituen erreferentea da.
Atzerriko merkatuetako presentziari dagokionez, ekitaldi honetan marka historikoa gainditu da Industria Arloko salmenta internazionalen esparruan, 3.973 milioi eurora iritsi baitira, 2010­ean baino %10,5 gehiago. Ondo­rioz, nazioarteko salmentek salmenta guztiekiko duten indizea %67ra arte igo zen 2011n, 2010­ean baino lau puntu portzentual gehiago. Urte askoko ikuspegitik begiratuta, 2009tik 2011ra arte, salmentak %25eko hazkunde nabarmena izan dute, eta bederatzi puntu portzentual inguruko igoera.

Langileei erreparatuz, Mon­dra­goneko kanpoko langileak jada 15.000 pertsonatik gora dira.
Industria jarduerei dagokienez, gero eta nabariagoa da nazi­oarteko izaera dutela. Hala, Tal­deak defendatzen duen tesia berretsi da, zeinaren arabera multilokalizazioa gure lurraldean kokatutako kooperatibetako lanpostuak defendatzeko estrategia egokia dela baieztatzen den.

Atze­rriko ezarpenen sareak hazkunde aipagarria izan du, 94 filialetaraino iritsi baita (aurreko urtean baino 17 gehiago), eta presentzia sendoa du Europan eta gorabidean dauden hainbat herrialdetan, horien artean: Txina, Brasil, India eta Errusia. Ildo horretan, nabarmentzekoak dira FPK-k Brasil eta Alemanian dituen enpresa proiektu berriak, Cikautxok Txinan, Maierrek In­dian eta Oronak Frantzia, Belgika eta Luxenburgon.

Inbertsioen atalari so eginez, Industria Arloan 335 milioi euro inbertitu dira. Horrez gain, I+G­+b­-ra 165 milioi euro bideratu dira, Taldearentzat berrikuntzak duen garrantziaren erakusle. Kor­­porazioak asmakuntzako 508 patente familia ditu, eta nazioarteko 39 proiektutan parte hartzen ari da, aeronautika, energia, IKT edo nanoteknologien sektoreetan, bes­teak beste. Arlo horretan, garrantzitsua da Mondragon Uni­­­bertsitatearen ekarpena azpimarratzea (2011n Gastronomia Zi­entzien fakultatea abiarazi zuen, Basque Culinary Center ­inau­guratuz); Korporazioaren zen­tro teknologikoen sarea, 14 zentrok osatzen dutena, eta kooperatiben ahalegin berritzailea. Adibidez,  ‘Orona IDeO’ proiektua. Europa mailan proiektu berritzailea da, ­eta bertan etorkizuneko irisgarritasun eta mugikortasun sistemak diseinatuko dira, eta erreferen­tziazko gune urbanistikoa izango da, zentro teknologikoen, unibertsitatearen eta enpresen arteko interakzioa ­erraztuko duena.

Negozio berrien sustapenari dagokionez, 2011n zehar aurrerapauso berriak egin dira jarduera berriak martxan jartzeko, horien artean ‘Lotus Range Extender’ ­(ekomotorraren proposamena automoziorako) edota Mondra­gon Health plataformari lotutako negozio berriak (Kiro Robotics, farmaziaren sektorerako eduki teknologiko handiko ekipamenduak garatuko dituena).

Banaketaren Arloan fakturazioa 8.040 milioi eurora iritsi da. Ekitaldiaren ezaugarria berriro ­ere kontsumoaren atonia izan da, baina urrats garrantzitsuak egin dira banku zorra murrizteko, prozesuen eraginkortasuna hobetzeko, eta prezioan lehiakorra den eskaintza komertzialaren aldeko apustua mantentzeko; marjina txikiagoa duen arren, kalitatea errekonozitua baitu, marka pro­pioa eta fabrikatzaileena uztartuz.

Finantzen Arloan, sektoreak ez du erraza eduki. Mondragone­ko entitateek ongi gainditu zuten ekitaldia, beren negozioen eraginkortasuna hobetzeko neurrietan oinarrituta. Euskadiko Ku­txak hornidura zuzkitzeko egindako ahalegin handiaren ondorioz amaierako Emaitza Garbia 19,4 milioi euro izan da. Nego­zi­o­aren estrategiari buruz, Euska­diko Kutxak Lagun Aro, SA eta Lagun Aro Vida, SA konpainien kapitalaren %100 erosi zuen, Ban­kaseguru estrategia berri eta integratuago bat hedatzeko helburuarekin.

Jose Maria Aldecoa Mondra­goneko Kontseilu Orokorreko lehendakariak adierazi zuenez, "2011ko ekitaldian, egoera gorabehera, nazioartekotzeari bultzada berria eta garrantzitsua eman diogu, merkatu berrietan sartu gara, berrikuntza sustatu dugu ­eta gure negozioetako batzuk birkokatu ditugu. Hori guztia aurreko urteko enplegu maila mantenduz, eta 2010eko emaitza operatiboen pare.

Beraz, ekitaldiaren balorazio orokorra positiboa da”. Gaineratu zuen moduan, 2011n 2013-2016 aldirako Mondragon­en Politika Sozio-enpresariala ­onartu izana oso garrantzitsua da. “Datozen urteetan jarraitu beharreko bidea markatzen duen mugarria da, eta dagoeneko lanean ari gara, gure negozioak bost estrategiaren inguruan eraldatzeko: Dimentsi­o­namendua, Na­zioar­te­kotzea, Berrikuntza, Elka­rrekiko lankidetza eta Konpro­miso eta Nortasun Kooperatiboa, gure gizartea garatzen laguntzen jarrai­tzeko, proiektu eta lanpostu berriak sortuz”, esan zuen.

Iturria: Lanabesa