Enpresen eta profesionalen sarea

Kalitatea kudeatzeko bost ISO arau euskaratu ditu Jaurlaritzak, eta enpresen artean hedatzen hasi da

2019-10-28 - Enpresarean

Arlo sozioekonomikoan euskara bultzatzeko bere helburuarekin bat eginez, Eusko Jaurlaritzak euskaratu ditu ISO kudeaketarako bost arau, eta dagoeneko enpresen esku utzi ditu. Eusko Jaurlaritzako Kultura eta Hizkuntza Politika Sailak eta UNEk 2017an sinatu zuten lankidetza-hitzarmenari esker egin ahal izan da urrats hori. Jaurlaritzak, gainera, zirkular bat igorri die euskal enpresei, aipatutako arauak euskaraz eskuragarri dituztela jakinarazteko.

Euskarara itzulitako bost arauak honako hauek dira:

• UNE-EN ISO 9001 Kalitatea kudeatzeko sistemak. Eskakizunak.
• UNE-EN ISO 14001 Ingurumen-kudeaketako sistemak. Erabiltzeko eskakizunak.
• UNE-EN 91OO Kalitatea kudeatzeko sistemak. Abiazio-, espazio- eta defentsa-organizazioetarako eskakizunak
• UNE 19601 Konplimendu penalerako kudeaketa sistemak. Eskakizunak eta erabiltzeko gomendioak.
• UNE-EN ISO/IEC 27001 Informazioaren teknologia. Segurtasun teknikak. Informazioaren segurtasunaren kudeaketa-sistemak. Eskakizunak.

Bingen Zupiria Kultura eta Hizkuntza Politikako sailburuak eta Javier Garcia Diaz UNE Espainiako Normalizazio Elkarteko zuzendari nagusiak 2017ko amaieran sinatu zuten neurri horiek bultzatu dituen akordioa. Hitzarmenaren helburua da ISO arauak euskarara itzultzeko programa bat garatzea hitzarmenak iraungo duen lau urteetan, baina epe hori baino gehiago luzatu ahal izango da. Arau tekniko horiek merkatuak jardunbide egokiei buruz duen adostasuna islatzen dute, erakundeen lehiakortasunerako funtsezkoak diren gaiei heltzeko orduan, enpresen ziurgabetasuna ezabatuz. Euskaratzeaz gain, ISO arauak  galiziera eta katalanaera ere itzultzen dira.

Eusko Jaurlaritza, Kultura eta Hizkuntza Politika Sailaren bitartez, hitzarmenaren xede den programaren UNE arauak euskaratzeaz arduratzen da, baita beharrezko eguneraketez ere. Horrez gain, urteko programan txertatu nahi diren arauen zerrenda sinatuko da urtean behin.

Iturria: Irekia